Alden Richards putting up foundation for orphaned and sick children, elderly

Hindi nagsasawang magpasalamat ang Pambansang Bae at “Eat Bulaga!” host na si Alden Richards para sa mga biyayang natatanggap niya mula nang pumasok siya sa showbiz ilang taon na ang nakalilipas.

Bilang pasasalamat nga sa Panginoon, sinisiguro niyang nakakapagbahagi siya ng biyaya sa ibang tao, kaya naman bukod sa pagiging mabait, nakilala na rin siya ng marami sa kaniyang pagiging mapagbigay.

Sa naganap na thanksgiving get-together niya kasama ang mga miyembro ng press nitong Martes, ibinahagi ni Alden ang pagnanais niyang bumuo ng sariling foundation upang maibahagi pa sa mas maraming tao ang mga natatanggap niyang biyaya.

Aniya, nais niyang opisyal na mailunsad ito ngayong taon o sa unang bahagi ng susunod na taon.

“Hopefully, this year or early next year, makapagpatayo ako ng sarili kong foundation para, at least, mas maging malawak 'yung nararating ng pagtulong natin sa mga nangangailangan,” ayon kay Alden.

Dagdag pa ng Pambansang Bae, “Gusto kong focus is more on mga batang naulila at may sakit, pati na mga matatanda.”

Ayon kay Alden, naniniwala siyang nararapat lamang na ibahagi ang mga biyayang natatanggap niya, lalong-lalo na sa mga nangangailangan.

"Naniniwala ako na kaya ako binigyan ng ganitong blessing ay para mai-share ko sa iba. Hindi para sarilinin o gamitin lang pang-personal. Mas nararamdaman ko 'yung halaga ng mga dumarating na biyaya kapag naibabahagi ko. Kapag sa akin lang, empty,” paliwanag niya.

Bukod sa araw-araw niyang pagbida sa “Eat Bulaga!” at sa “Sunday Pinasaya” tuwing Linggo, bida rin si Alden at ang kaniyang katambal na si Maine Mendoza sa kanilang kauna-unahang solo movie at box-office hit na “Imagine You & Me,” na kinunan pa sa iba't ibang bahagi ng Italy.

Mayroon ding screening ang naturang pelikula sa iba pang bansa, tulad ng Amerika, Canada, United Arab Emirates, Singapore, Australia, at marami pang iba.

GMA NEWS ONLINE